"Faith is taking the first step
even when you don't see the whole staircase"

›››  Martin Luther King

Nuummi Sukkortut Peqatigiiffiat - malittasrisassat 

Nittartarkami saqqummertinneqarput ulloq: 21/3-2012

 

Nuummi Sukkortut Peqatigiiffianut

malittarisasat

 

§ 1

Peqatigiiffik

 

Peqatigiiffiup taaguutaa: Nuuk Diabetes forening/Nuummi sukkortut peqatigiiffiat

 

§ 2

Peqatigiiffiup siunertai

 

  1. Peqatigiiffiup siunertaasa pingaarnersaraat inuit sukkornermik nappaateqartutut nalilerneqarsimasut soqutigisaannik isumaginninnissaq.
  2. Peqatigiiffiup suliniutigissavaa sukkortut sapinngisamik nappaatip malitsigisanik annertuunik napparsimanerulernatik pitsaasumik sivisuumillu inuuneqarnissaat.
  3. Sukkortut ilaqutaallu tapersersornissaat ilitsersornissaallu.
  4. Suliniutit aqqutigalugit qaammarsaaneq, taamaalilluni sukkorneq pillugu innuttaasut paasissutissanik amerlanerusunik pissarsitillugit.
  5. Oqartussat pisortallu sunnerniarlugit, taamaalilluni pitsaaliuineq nakorsarneqarnerlu siuarsarneqarlutik.
  6. Isumaginnittoqarfik peqqinnissaqarfillu suleqatigalugit napparsimasut tamarmik pitsaanerpaamik isumassorneqarsinnaanissaat ataavartumillu katsorsarneqarsinnaanissaat.
  7. Peqatigiiffiup siunertaanut aningaasanik katersiniarluni assigiinngitsutigut suliniuteqarnerit, soorlu aamma aningaasalersuisussarsiorneq aningaasaateqarfinnillu aningaasanik qinnuteqarnerit.
  8. Nuna tamakkerlugu suliniuteqartarnissat siunertaralugit sukkortut peqatigiiffiinik allanik suleqateqarneq.

 

§ 3

Ilaasortaaneq

 

Peqatigiiffik inunnut sukkornermik nappaateqartutut nalilerneqarsimasunut ilaqutaannullu tunnganeruvoq, kisiannili kikkulluunniit ilaasortanngorsinnaapput.

 

Imm. 2. Ilaasortatut akiliutit ukiumi ullorsiutit malippai:

  1. Nalinginnaasumik ilaasortaasunut ukiumut akiliutaasoq: 75,00 kr.
  2. Ilaqutaasutut ilaasortaanermut ukiumut akiliutaasoq: 50,00 kr.
  3. Sulisinnaajunnaarnersiutilinnut, utoqqalinersialinnut meeqqanullu ukiumut akiliutaasoq: 50,00 kr.
  4. Suliffeqarfinnut, peqatigiiffinnut ukiumut akiliutaasoq, ikinnerpaamik: 500,00 kr.

 

§ 4

Ataatsimeersuarneq

 

Ataatsimeersuarneq qullersatut oqartussaanersaavoq.

 

Imm. 2.Ukiut tamaasa februarip qaammataani ileqquusumik ataatsimeersuarneqartarpoq.

 

Imm. 3.Ileqquusumik ataatsimeersuarnissaq ullunik 14-inik sioqqullugu ataatsimeersuarnissamut aggersaasoqartarpoq, avisitigut saqqummiussinikkut imaluunniit radiokkut, kiisalu illoqarfimmi allagarsiinikkut.

 

Imm. 4.Ileqquusumik ataatsimeersuarnissaq ullunik arfineq marlunnik (7) sioqqullugu ilaasortat siunnersuutaat kiisalu suliniutissatut saqqummiukkusutat siulersuisunut tunniunneqartassappput.

 

Imm. 5.Ileqquusumik ataatsimeersuarnissaq sapaatit akunneranik ataatsimik sioqqutsisumik naatsorsuutinik kukkunersiorneqarsimasunik kiisalu siulersuisut nalunaarutaannik naqinneqarsimasumik saqqummiussinissaminnut siulersuisut pisussaatitaapput.

 

Imm. 6.Taasisinnaatitaassagaanni siulersuisunullu qinigassanngortissinnaassagaanni peqatigiiffimmut ilaasortaasariaqarpoq ilaasortaanermullu akiliummik akileereersimasussaalluni.

 

Imm.7.Ataatsimeersuarnermi aalajangikkat nalinginnaasumik amerlanerussuteqartut taasinerisigut aalajangerneqartarput.

 

Imm.8. Siulersuisunut qinersinermi taasisinnaatitaasut tamarmik taasiffimmi atinik pingasunik allassinnaapput, taasinerni allani tamaniImm. 7-imi aalajangersakkatut.

 

Imm.9.Ilaasortat allat sinnerlugit taasisoqarsinnaavoq allagartaq pisinnaatitaassutitut uppernarsaat  atsiorsimasoq atorlugu.

 

Imm. 10.Ileqquusumik ataatsimeersuarnerup ingerlanera:

 

  1. Siulittaasup ataatsimeersuarnermik ammaanera.
  2. Ullormut oqaluuserisassat akuerineqarneri.
  3. Ataatsimiinnermik aqutsisumik imaqarniliortumillu qinersineq, ataatsimiinnermik aqutsisoq siulersuisunut ilaasortaassanngilaq.
  4. Siulittaasup nalunaarusiamik saqqummiussinera.
  5. Naatsorsuutit kukkunersiorneqarsimasut akuerisassanngorlugit saqqummiunneqarnerat.
  6. Ilaasortaanermut akiliutissanik aalajangiineq.
  7. Ukiumut tulliuttumut missingersuutinik akuersissuteqarneq.
  8. Ilaasortat siunnersuutaat nassiunneqarsimasut.
  9. Qinersineq:              
    1. Siulersuisunut ilaasortat 3-7-it qinerneqassapput sinniisillu marluk (2)
    2. Kukkunersiusunik qinersineq
  10. Tamalaat.

 

§ 5

Immikkut ittumik ataatsimeersuarneq

 

Siulersuisunut ilaasortat amerlanerussuteqartut imaluunniit ilaasortat 1/3-diiliisa kissaatigippassuk immikkut ittumik ataatsimeersuarneqassasoq, aggersaanissamik qinnuteqaat tamatumunngalu tunngavilersuutit nassiunneqareerpata immikkut ittumik ataatsimeersuarneqassaaq.

 

Imm. 2.Immikkut ittumik ataatsimeersuarneqarnissaa sioqqullugu kingusinnerpaamik sapaatit akunneri marluk (2) sioqqullugit nalunaarutigineqassaaq.

 

Imm. 3.Immikkut ittumik ataatsimeersuarneq pissaaq ileqquusumik ataatsimeersuarnermut aalajangersakkat naapertorlugit, taamaattorli ilanngunnagit imm. 5-6-7 kiisalu pinngitsoorsinnaallutik imm. 9, imaluunniit taassuma ilaannai.

 

§ 6

Siulersuisut

 

  1. Siulersuisut ima inissitsitissapput; siulittaasoq, siulittaasup tullia, aningaaserisoq aamma allatsi.
  2. Siulittaasup peqannginnerata nalaani siulittaasup tulliata siulittaasup suliassai isumagissavai.
  3. Siulersuisut ataatsimiinnerinit aalajangerneqartut pillugit imaqarniliaq allanneqartassaaq.
  4. Siulersuisut ikinnerpaamik ukiumut sisamariartumik (4) ataatsimiittassapput.
  5. Siulersuisut ataatsimiinnerminni aalajangersimasunik oqaluuserisaqartassapput, minnerpaamik makkunannga imaqartussamik:
    1. Ullormut oqaluuserisassat akuerineqarneri
    2. Imaqarniliortussamik toqqaaneq
    3. Siunnersuutit takkuttut
    4. Ilaasortat ataatsimiitinnissaannut/ataatsimeersuarnissamut piareersarneq
    5. Peqatigiiffiup aningaasaateqarnera
    6. Ataatsimeersuarnermi aalajangikkat malitseqartinnerat/kinguneqartinnerat
    7. Imaqarniliamik akuersissuteqarneq

 

Imm.2. Ulluinnarni ingerlatsineq akisussaaffeqarnerlu siulittaasup siunersuisunullu ilaasortap allap isumagissavaat.

 

§ 7

Siulersuisut pisussaaffii

 

Peqatigiiffiup ingerlanneqarnera siulersuisut akisussaaffigaat. Aningaasaqarneq ilaasortanullu sammisaqartitsinissatigut neqeroorutit.

 

Imm. 2.Ataatsimeersuarnermi aalajangikkat malillugit siulersuisut sulinissaminnut pisussaaffeqarput.

 

Imm. 3.Siulersuisut ukiumut ikinnerpaamik marloriartumik ilaasortanik ataatsimiisitsisassapput.

 

Imm. 4.Ataatsimiinnerni tamani imaqarniliorneqartassaaq.

 

Imm. 5.Piffissap qinigaaffiusup nalaani siulersuisunut ilaasortaq ataaseq tunuarpat sinniisumit taarserneqassaaq.

 

Imm. 6.Siulersuisut qaqugukkulluunniit suleqatigiissitanik imaluunniit ataatsimiiititalianik pilersitsisinnaapput.

 

Imm. 7.Siulersuisut qinerneqareernerini, sapaatit akunnerisa ataatsip iluani inissitsitissapput.

 

§ 8

Naatsorsuutit

 

Peqatigiiffiup naatsorsuutaasa ukiumi ullorsiutit malippai. Isertitanik aningaasartuutinillu eqqortumik naatsorsuusiornissaq aningaaserisup pisussaaffigaa.

Taamattaaq ilaasortat nalunaarsorsimaffiat suliarineqartussaavoq. Aningaasaatit aningaaserivimmut ikineqartassapput.

 

Imm. 2.Aningaasaqarneq ingerlaavartumik siulersuisut misissortassavaat. Siulersuisut ataatsimiinnerini tamani naatsorsuutit saqqummiunneqartassapput.

 

§ 9

Ilaasortaajunnaarsitaaneq

 

Siulersuisunut ilaasortaq siulersuisunit ilaasortaajunnaarsitaagallarsinnaavoq, eqqartuussinikkut uppernarsarneqarpat, pineqartup peqatigiiffiup aningaasaataanik/atortuinik atornerluisimappat, imaluunniit siulersuisunit aamma ataatsimeersuarnermit aalajangersakkanik unioqqutitsisimappat.

 

Imm.2.Eqqartuussinermi aalajangiinissap tungaanut siulersuisunut ilaasortat amerlanerussuteqartut siulersuisunut ilaasortaq ilaasortaajunnaartikkallarsinnaavaat.

 

Imm. 3.Pineqartoq imm. 1 malillugu unnerluutigineqarsimappat, pinerluttulerinermullu inatsimmik unioqqutitsineqarsimappat, pineqartoq siulersuisunut ilaasortatut siulersuisut tunuartissavaat.

 

Imm.4. Peqatigiiffimmit tunuartitaaneq taamaallaat ataatsimeersuarnermit aalajangerneqarsinnaavoq.

 

§ 10

Peqatigiiffiup atorunnaarsinneqarnera

 

Peqatigiiffik taamaallaat atorunnaarsinneqarsinnaavoq ilaasortat ikinnerpaamik 1/3-diilii ataatsimeersuarnermut takkussimappata, kiisalu peqatigiiffiup atorunnaarsinneqarnissaanut ataatsimeersuarnermut takkuttut ikinnerpaamik affaat (½) tamatumunnga isumaqataappata.

 

Imm. 2.Peqatigiiffik atorunnaarsinneqassagaluarpat, aningaasatigut/atortutigut pigisaasinnaasut aningaaserivimmilu uninngasuutigisinnaasat ikiuiniarnermi siunertanut tunniunneqassapput, ataatsimeersuarnermi aalajangerneqartut malillugit.